點解免費AI唔夠用：我喺會八十分享嘅課金實戰經驗
今年六月，我再次獲邀上到「會八十」做嘉賓，同阿Bu、陳強、Greg 傾一個好多人都關心嘅話題：究竟俾錢用 AI 值唔值得？
呢次直播有超過一千三百人同時在線收睇。我哋做咗個投票，結果好有趣：498 票入面，76% 嘅觀眾係冇俾錢用 AI 嘅，得 24% 有課金。
呢個數字印證咗我日日喺企業培訓見到嘅現象。
的士司機嘅陰謀論
去錄影嘅路上，的士司機聽到我話去講 AI，即刻同我講：「AI 呃你㗎，AI 係一個陰謀嚟㗎。」
佢覺得 AI 會偷走人嘅智慧，又呃人嘅錢。呢種諗法唔係個別例子——我喺好多企業培訓都遇到類似嘅懷疑。
但問題唔係 AI 本身，而係大部分人根本未用過「真正嘅」AI。
三大迷思
我喺節目入面分享咗三個關於 AI 工具最常見嘅迷思：
迷思一：「AI 好蠢，幫唔到我」
陳強分享咗一個好好嘅例子。佢用 Grok 同 DeepSeek 去 Summarize 一本書，結果兩個工具都將 Chapter 嘅次序搞亂晒。
呢個問題嘅根源係乜？佢用緊嘅唔係「官方產品」，而係「分發商產品」。
AI 工具可以分為兩大類：
- 官方產品（ChatGPT、Gemini、Claude）——由訓練模型嘅公司直接出品，功能最完整
- 分發商產品（POE、Perplexity）——轉發其他公司嘅模型
好多香港用戶用 POE，但唔知 POE 預設嘅「Assistant」模型根本唔係 ChatGPT，而係 POE 自己出嘅較弱模型。用咗渣嘅模型，當然覺得 AI 好蠢。
迷思二：「我課咗金但冇分別」
呢個係我覺得最可惜嘅情況。好多人俾咗每月 $20 美金買 ChatGPT Plus，但從來冇打開過入面嘅隱藏功能。
陳強形容得好好：「你買咗間屋，但唔知原來仲有個 Basement、有個停車場、有個游泳池。」
我補充：「住咗間三房屋原來一直當一房住。」
迷思三：「課咗金佢都係蠢」
因為你冇轉 Model。
o3 同 4o 嘅分別
呢個係成晚最關鍵嘅一個 insight，亦都係 Greg 即場講「淨係呢個直回票價！」嘅原因。
簡單嚟講：
- 4o 係一部「文字接龍」機器——佢預測下一個最可能出現嘅字。好似你出「蘋果」，佢就估下一個字可能係「汁」
- o3 係一個推理引擎——好似 Doctor Strange 喺腦入面 run 咗千幾萬個唔同嘅 scenario，搵出正確答案
用落地嘅講法：o3 係 IQ 高啲，4o 係創意多啲。
所以：
- 要搵正確答案（分析、研究、查證）→ 用 o3
- 要做創作（寫作、翻譯、brainstorm）→ 用 4o
我用咗一個例子：上個禮拜去山頂行山，影咗前面一個島嘅相，問 ChatGPT「呢個係咩島？」。o3 分析咗四十幾秒，放大縮細逐個 pixel 睇，最後正確答出係南丫島。4o 做唔到呢種分析。
三個一定要開嘅功能
如果你已經課咗金，呢三個功能你一定要識：
- 模型選擇器——左上角可以揀唔同模型。我問過十個人，七個唔知有呢個功能
- 深度搜索——可以連接你嘅 Gmail、Google Calendar，幫你搜尋同整合資訊
- 設定面板——左下角嗰粒齒輪掣。所有寶藏都喺 Settings 入面
76% 嘅人都未上車
如果成千幾人入面得 24% 有俾錢用 AI，而入面好多人仲未識用啲功能——真正 fully utilize 緊 AI 嘅人，可能得個位數百分比。
呢個就係機會。
喺企業培訓入面，我見到識得用 AI 嘅人同唔識用嘅人之間嘅效率差距只會越嚟越大。而家開始學，仲嚟得切。
多謝會八十邀請我上節目分享。如果你想了解更多關於 AI 培訓嘅資訊，歡迎喺 LinkedIn 搵我傾。
